محتاجك .. الشاعر ايهاب المالكي
محتاجك كَبل مو هسه وكتك فات
كبل اسنين جيتك جنت اتانيها
انا ماصدكَت تنطبكَ عيني شلون
أَرد افتح جفنها وكَوه اصحيها
غض عيونك وشردني خلي ارتاح
واني عيوني عنك راح ألهيها
و احلفلي شبه حتى اقتنع غلطان
كفارة اليحلف تالي ينطيها
وبعد لا تلتفت للموته اليمرون
اذا لاكَتك روحي بدون راعيها
من اكَلك رايح .. اِبرد حتى اَظل زعلان
اِحزن .. بس حسرتك عني اخفيها
ولا تقره شعر يمي ولو لحظات
سمعني سوالف وزن ما بيها
رِد الذكرياتي وسد عليك الباب
والأسوار الي بطولك راح اعليها
ادمن ع النفس بس مره اذا جريت
نفسي ومن هوه اسمك ريتي امليها
طفيتك جمر كَوه ابطلاع الروح
من الدخان سوده الدمعه البجيها
حبني براحتك كون اني مو وياك
و ادوار الضحية لغيري خليها
خضت التجربة وشفت الخسارة شلون
مره شما خطتها وردت احليها
بالقدرة كدرت انسى سهل ذكراك ؟!
احذر من صوَرَك خاف احاجيها
انا مثل الخرز عندي الجروح انواع
كل واحد بحاله وميزه يحويها
حمل بس الثكل مرات هم مطلوب
الي يطير الكواغد خفة البيها
حبني براحتك جنك تزور كبور
ما املك دموع كَبالك ابجيها
تدري من الغصن كل الطيور اتطير
اذا بس مره وحده الچيله تخطيها
حبني بلا سبب وبدون كل غايات
هيجي بلا مقابل لله سويها
مو كل الزرع مسموح الك تحويه
أي فلاح اسأله الورده يحويها ؟
يل بروحك قفص وجت بلابل بي
انا روحي العناكب عشعشت بيها
اريد ادخل كَلب ما الكَه بي تمثال
وأسأل عالحضاره ويمتى بانيها ؟
ما اريد اليضحي بروحه بس احتاج
نص التضحيات الجنت اضحيها