قصيده للشاعر المبدع (ايهاب المالكي)

السلام عليكم
اليوم جبتلكم قصيدة كلش حلوة للشاعر المبدع (أيهاب المالكي)
وأكيد راح تعجبكم



بعد ما اجيب جرحي اتروفه اليّه اردود...
أنه استجمعت حيلي وبالصبر رفته...
تمرّ واتشوفني شلونه الوكت وياي...
ما مهموم واضحك والحزن عفته...
ما خليتلك خيط امل تترجاه...
(كفض) حتى الخيال امن الحلم شلته....
وضعف روحي بديّ جريته امثّل بيه...
كدام اليضدّك للصلب كدته....
من اتشوفني تعرفني ...؟؟؟؟لا والله...
مو ذاك الغشيم المن كبل شفته...
اكبالك غير واحد بي شبه من ذاك ....
ما يشبه هذاك البي جرح عفته...
مرّه التجربه المريت بيهه وياك...
مرّه وعلمتني وحنظلك ضكته...
ولَو خسران....بس الله ايعوض الراح...
حب راح ابعشرتك وانتهه بوكته....
عفتك دون ما تسمعلي وقع اقدام....
ما تحجي الشموع وينطفن سكته...
عرض كدامي ظلي وعطّلت ممشاي....
حاجيته ونصحته ومن رفض دسته...
وظل حلمك ابعيني اعله الجفن مطروح....
جذاب اليكلك من رحت جسته...
ولأن ما ردت منك شي يظل تذكار ...
ما ردته ابحياتي وعالخلك سمته...
منو الياخذ حلم ...من ينطي زايد بيه...؟؟؟؟
حلم كلش جديد وما استعملته...
أبيعه الغير واحد مثل ما سوّيت...
وياي وحنينك للغرب بعته....
مثل سجينتك راح انسحب بهداي....
حتى اترك حياتك واطلع ابسكته....
بلا ما تشعر ويكسر قر اري الشوك...
وارجعلك واكول: اتسرعت خذته...
ردت ينباك جرحي ورصّعت بي ماس...
ردت اغوي الحرامي ومن رفض لمته...
أنه الطير النزل للطعم من حطّيت ....
روحك للضحيه ومن نزل صدته...
ترك لجلك سمه وراويته المجازاة...
من كصيت جنحه وللقفص جبته...
عفتني اويه الجكاره اثنينّه امورثين...
محّد طفّه الاخر وانطفيت انت....
كبل جم مره اجيلك مشتري وما ابيع...
واسمع صوت روحي اتكلي: (عاذرته)...
وانكثلك اسراري ابحضن لحظة شوك...
بس تالي الكه سرّي الناس سامعته...
جنت مثل الهوه موتي ابصفنتي ايصير...
يحييني اليكلي: الشادهك شفته....
واحلف (كارهك) واكتشف يطلع شوك....
من ضمن السوالف بالحجي الكلته....
ردت جم مره اطلعك ...كلبي ما بي باب....
دوّرته اعله كيفي وكل كتر درته....
واتعلمت كلشي في سبيل انساك...
بس فراك وجهك ما اتعلمته....
هسه ابسدّ خريفك حطّبت ذكراك ...
خاف ايرّد خضارك وانتشي ابجيته....
بعد ما اريدك اتظل خيط اجلّب بيه....
وابقه امتاني جفك يفزع ايعتّه....
اتعوف الدفن حبك مثل سرّ بالراس...
تركض عاليحطك راس سالفته...
يالمهدور حبك مني كون اتشيل...
لا تفترّ ابروحي وثاري ما خذته...
أنه من اوميتلك مو من ألم طعنات...
لا بس ردت اكلك: (كلبي ما لحته)...
ما ينخدع كلبي ابدمعتين ارخاص....
تتلطخ ابدمه ....وتقره فاتحته....
عالي الجف اذا وكت الزعل ينباس ...
عكس الجف هذاك البالصلح بسته....


تحياتي