سكران بالعسل

احبك حب

لا حباهو زول لي زول

و لا اتقال

و لا خطر في الخاطر

عشان يتقال

غنا و موال

بحبك

انتي يا عجوة عسل الريد

يا الصبح الفي جمالو فريد

بحبك

و بسكت ما بجيب نم

و لا كلمات في قصيد

بحبك و الحب هو ذاتو شويه عليك

لو قالوا ناس الريد

في زول وقع مكتول

بكون يا بنيه

ياهو ذاتو الزول

الشاف سحر عينيك

و صبح مفتون

كضم تب

غلبو الكلام

صبح زي محموم

و ما محموم

بيهترف ساااااااي

يجيب كلام ما موزون

و لا مفهوم

زي مجنون

لكن جن معلوم

وقت يفارق عينيك

اليوم داك معدوم

لا بتحسب

و لا بتكتب

و لا في السجلات مختوم

إلا يوم شوفك صباح وجهك الضاوي

تجيهو البسمة من مافي

و يكون سعيد مبسوط

ينطط ساااي

زي طفلن

رجع من الروضة

يحكي لي أمو

كلام ما بتفهمو غير أمو

حروف مبدلة

يخلط الكاف مع اللام

و عجبا

تسمع الدال بدل الجيم

رظينا يفهمنو الامات

و تلمو في حكره و تضحك

يقول ليها

يا يمه ( آيز اسلب )

و سريع الترجمان شغال

تقوم تديهو

و زين يشرب

و انا يا حلوه

زي هدا الشافع

من اشوفك

اقوم اتخمخم اتكبكب

و اسمع نغيمات صوت

يمين لا عارف افرق بين أني

في العسل بشرب

و لا من العسل بشرب

و لا بالعسل اشرب

و اشرب

صح يا ناس سكران العسل بيطرب ؟

اخي جاروط
تتميز مقطوفات احساسك بالصدق والرقي
اتمنى ان تستمر في الكتابه لتمتع عيوننا ونكتحل بروعة اسطرك والكلمات

سلمت لنا يمناك على كل حرف خطته,,,
,,,,,,على كل كلمة رسمتها = '';
عذرا,, لتقبل عباراتي المتواضعة,,,
فلم اجد الحروف التي تليق بسمو قلمك ,,
,,,,التي قد تلملم ردا يناسب روعة ما قدمته
لك ودي وجل تقديري,,

رقيقتي الغالية

هي من صدق احساسك بالجمال المتدفق منك

يرى كل شيء جميل و انيق و راق

يسعدني مرورك الكريم

ودي و تقديري

حفظك الله

صغيرتي الحساسة جدا

أنتي حرفك شامخا يقف دليلا على سموك

و علو مكانتك

يشرفني دوما حضورك

و حرفك يطربني

ابنتي العزيزة

كوني بخير

ودي و تقديري

حفظك الله