السلام عليكم ورحمة الله وبركاته
اخيراً بعد رحله جميله معكم ومُشاركاتكم والمُنافسه الراقيه والجميله بينَ الجميع .. حازت ثلاث مُشاركات على قناعة لجنة التحكيم ...
اسماء الاعضاء الذين حصلوا على المراتب الثلاثه الاولى في مسابقة قسم الشعر الشعبي العراقي والعربي.
المركز الاول/المشرفه :remas عازفة اوتار الحب
وقد شاركت بقصيدة انا ضد هذا التطور للشاعر نائل المظفر
اني ضد هذا التطور
صح قبل شارع ترابي بلا رصيف
والصريفه البيها كاعد تمطر المي على كيف
لكن احسن
ماجوه التبليط رجلي ولانمت فوك الرصيف
كبل حمام بصريفه ردي وبرده وشته وبارده
وبابه برده
وكلنا ماخذنا الرجيف
هسه كيزر ماي حار ودوش عدنا
وبالألف .. واحد نظيف
قبل تنور اهلي طين والصديق يصير اخوي لو علي مرة يضيف
هسه من صار الخبز عالكهرباء ضل يحط عينى على اختي وهوه ياكل بالرغيف
انا ضد هذا التطور .. موشريف
لاتكولي انسان رجعي .. الناس صعدت للقمر
ارفض اصعد للقمر حتى ما اصيرن خفيف
قبل خبز شعير ناكل
ولو شبع واحد يصدق عالفقير
حتى عن ذنبه يكفّر
هسه جلفراي ناكل
ولو طلب خبزة الفقير نتفل بكصته ونكفّر
انا ضد هذا التطور
كبل بس فانوس عدنه
وجنه كل مغرب نشعله وعالنبي نصلي ونكبر
هسه لو شعلو علينا الكهرباء
حتى شايبنه يصفّر
انا ضد هذا التطور
كبل جان الخوص كصب وماتزل عالجار عيني
جانت الكصبات تستر
هسه طابوك السياج
شويه ناصي!!!!!
بصفه كرسي!!!!!
فوقه رجلي؟؟؟؟
ارفع ايدي!!!!!!
بس أشــــر؟
هيه تطفر....
انا ضد هذا التطور بالحياة
عملوا الاف التجارب والبحوث حتى تدخل انظمة وندوز كل الحاسبات
بلكي عدكم حاسبه بأحدث نظام تحسبلكم جم عراقي بلا عشه تعود يبات
وتضرب بنود الحصار وتطرح الهم العلينه
وتقسم ضهور الطغاة
انا ضد هذا التطور ياطغاة
صنعو تلفاز ريموت كونترول حتى محد يتعب بوكت الصلاة
هوه كاعد لوسمع صوت الاذان يدوس دكمه بوحده يبدل قناة
ومارضو عالتفرقه بزي النساء الامريكان
وحده متكبعه بحرير وحده نص ردن وردان
صممو بوردا حديثه وحققو بيها التساوي
وهسه كلهن عاريات
ان من هذا التطور ما اريد
ما اريد الميرميدا تصمم ازياء النساء حتى لا يتعرى جيد
وما اريد الناطحة تدك بالسحاب حتى لاتعلى العبيد
عندك ايد وعندي ايد
ما اريد بكومبيوتر تنخزن جثة شهيد
كبل طب اعشاب جان يعني لو كلبك يموت تموت كلك ماتفيد
هسه لو كلبك يموت الطب يكلك ماتموت كلب اي تمساح نزرعلك تريد
ولذلك ما اريد
ما اريد كلما اكص جف الحرامي يروح يزرع جف جديد
وما اريد تنغرس نطفة برحم - حتى لا ولد الزنا بوكتك تزيد
وما اريد امريكا تستنسخ بشر - حتى لا كل يوم تستنسخ يزيد
انا ضد هذا التطور
سحبو بليزر رصاصه - يعني نقذو روح واحد بالسويد
وضربو بليزر الف ملجأ عراقي وذابت عضام البشر ويه الحديد
انا مو ضد التطور
انا من هذا التطور ما اريد
-
المركز الثاني/العضوه:جوليا
وقد شاركت بقصيدة:خذني يمك للشاعر جبار رشيد
خذني يمك بعد ماضل كل عذر لاتعتذر
ليل عمري وعمرك مخلص بعد مابيه صبر
خل نلم احلامنه وناخذ صورهن قبل لاياخذهن ابدربه الفجر
وخل نلم الباقيات سنيني وسنينك نسويهن عمر
وهنه ميكفن عمر؟؟
ونبدي من جده وجديد بواهس سنين الصغر
ولو وازانه الكبر
خل تمشي ايامنه بخطوة العاقل من عثر مره ورجع يمشي حذر
وخل نعيش الحب ستر
خل نظم ارواحنه ابيناتنه وي اسرارنه وما نشتهر
وأفتخر بيه وي روحك وآني وي روحي اضل بيك افتخر
خل نسوي العشره ورقه
ونصنع من الدمعه والضحكه حبر
حتى كل لحظه التمر بالجاي نكتبها شعر
وخل نكول الماضي غلطه وذنب يسجل ذنب من ينذكر
حبني لاتضل تعتذر
حبني واجبرني على حبك؟ الروح ماتعشك لون ماتنجبر
السيف ماينهاب لوماكو الطبر
حبني لاتضل تعتذر
واعترف راح اعترفلك
واحنه شو نفس الامر!!
اثنينه انبعنه بسعر جوه السعر
اثنينه انبكنه حدر شمس الظهر
اثنينه السجين تانتنه نذر
اثنينه اتوهمنه بالحب ننتصر
اثنينه انعاني الغدر
واعترف راح اعترفلك
كلبي جان شكد جسر
وآنه جتفت الجسر
وآنه وزيت الحمامه على النسر
واسمع السر الخطر
صنم سويته ابديه وادري ماينفع يظر!
وحاطه كبالي وعجيبه الشوك
من عنده انتظر
وانته مثلي بهل أمر
صنم سويته بديك شتنتظر
خل نهدم اصنامنه وكافي الكفر
وبلكي نهده ونستقر
وبلكت وياك وانه وياي استمر
وبلكت المامر كبل هسه يمر
وبلكت جناح العشك لبعيد ياخذنه ويفر
ونترك الممنوع والميصير
خل نغط بالماي مو صرنه جمر
وبلكي نصحه من السكر
خذني يمك كبل لايخلص صبرنه
ويطفه دم وجوهنه وتطلع صفر
خذني يمك كبل لاينحك ذهبها اطباعنه وتطلع صفر
خذني يمك كبل لا يم الصفر ينحط صفر
المركز الثالث/العضوه :اسيل الدلوعه
وقد شاركت بقصيدة للشاعر ايهاب المالكي
عالحب كتلك البي تضحية يعيش
خذت رايي وسمعته وبية ضحيت
وشفت حفل افتتاح جروحي للناس
وشفتك من بعيد بروحي گصيت
طرت جن دمعة وبجنحينها رموش
وعلى شجرة ضحكتك سكته حطيت
خيل ظنوني طلعت خيل عرجاء
وانا مراهن عليها تفوز ظنيت
من شفتك اطش سنيني واللة
لأن بيهن حلا حسبالي جكليت
غشيم وگلت ماساوي اليلمون
عزت نفسي ما خلتني لميت
انا بلا وعي من اطيتك الروح
وعقل ماجان عندي وهسة فزيت
ماجذب واگلك باجر انساك
عفتني وذكريات هواية خليت
اذا كل حايط البي اسمك يطيح
على هالحالة لازم نهدم البيت
بأخير ايام عشت بروحك هواي
ديرة شايلين ووحشة حسيت
ظلمة وريح بيها وصوت بيبان
وردت اطلع ولكن ما اندليت
انا الباني السفينة ومو مثل نوح
صعدتك وبالطوفان ظليت
وجبت عشب الخلود اطيتك اياة
وگلت احمل الفشلة وخالي رديت
بحرگتي وخفت تدريجيآ اشتاق
وخفت ردود قلبي يگلي حنيت
من دمعتي لحجيك وكت الوداع
خط وهمي بوكتها بجفي جريت
طلاسم نظرتك فكتها الاعذار
وبعيونك شگد الغاز حليت
جنت تحجيلي وايدي تهدم احلام
وبمعول دمعتي بقوة دگيت
بحيث من انتهيت من المواضيع
ذﯾچ الساعة ماظل كلشي هديت
فدة من ﯾنچفي يگولون عالماي
وفدوة شلون اگلك ماتبديت
انا شفتك ثلج بحلوگ شمات
معقولة بحلگهم ما حتريت
ماگتلي الرواية اخرها مبتور
جا بأول مشاهد مانشديت
ولو ادري اليظل ممنوع مرغوب
لارخصت روحي ولا انذليت
انة ابحرت بيك اعناد عالروج
وعلى خصر الشراع وزار شديت
الهوة هذا اليمرني اتخيلك بي
حته التقي وياك منين ماجيت
يعني بمعنى اخر مستحي احجيهة
ترة بس انته غيرك ماشتميت
وحررت اسمك من شفايف الغير
وعلمودك شگد حروب طبيت
وبعدت ذرائع قادر اجتاح
ولكن شبر منك ما أحتليت
اكض الليل بيدي من اوگف وياك
بدليل شگد عليك نجوم طشيت
جنت اگدر اجيك بدون عنوان
وحته ادخل بگلبك لو اضطريت
علي محسوب سر وانته مگيول
وعلى ازغر اعدائك ما انظميت
ما عندك عذر ينگال للناس ؟
يمي ومن حجيهم ما افتكيت
لهسة اكل بصبعي الاشرت بي
عليك وبي الف نيشان خليت
مثل حب الارض وية الشمس بي
جنت سطحي بنظرتي وفطرة حبيت
لو ادري الشمس ماتفتر وياي
على روحي بعشرتك ما افتريت
انة عابيت حته عيوني بچفاك
بيهن وبنظرهن مااعتزيت
مر يم بيتنا مستطرق وشوف
تلگة اباب بيتي عيون ذبيت
انة ظهري احترف طعنات العزاز
وگمت اعرف اديهم لو اندجيت
بلا شوف واگلهم ها منو فلان
بس انته عكسهم ماتسميت
حته انساك لازم ينلغي الليل
اذا بالليل اذكرك جا سويت
واحتار من اظل ابين رائين
اذا عن رأي منهن ما استغنيت
بما انك عفتني بكل الاحوال
ماتفرق نسيتك لو تناسيت
-
الف مبروك للفائزين الثلاثه وحظ اوفر للمشاركين الذين لم يُحالِفُهم الحظ .
تحياتي واحترامي
11-19-2012 ~ 12:33 AM
رد: نتائج مسابقة قسم الشعر الشعبي العراقي والعربي
العرض العادي
المواضيع المتشابهه