قصيده مهداة للشاعر كاظم اسماعيل كاطع بقلم الشاعر كريم راضي العماري

قصيدة مهداة للشاعر الكبير كاظم

كاظم اسماعيل الگاطع بمناسبة

اربعينيته رحمه الله واسكنه فسيح جناته

======================


مثل ما ينده المحبوب محبوبه

سمعتك تنده ابروحي

او فزيت او گلتلك هاه

او شفت ارسومنه ابعينك

ضوه الفانوس

وتراب الوكت غطاه

علمني حبيبي اشلون

وجهك انا راح انساه

وانه وياك طيبنة الجرح بالاه

انه وياك من كان الوطن عطشان

من ماي القصائد احنا شربناه

وفرق بين التودعة

او ينتهي الموضوع

او فرق بين التودعة

او بالخبز تلگاه

نعم موتك قدر والبشر كلهه اتموت

بس لمن متت

صار البحر تابوت

وابغداد فوگ الروس

احنة الگمر شيعناه

وحروفك بقن لوحات

على وجه الزمن

يقراهن التاريخ

بس خجلان من ايگول

هذا الشاعر اظلمناه

كاظم لو قرة من شعره للاحجار

صدگني الاحجار اتگول

سمعته الشعر الله

اوكاظم من يحب مثل الشمع ويذوب

يصبر عالوجع بس مايگول احاه

كاظم مدرسة او طلابها النجمات

يتعلم شعر من عنده اليقراه

كاظم بلسم اجروح العراقيين

داوه اجروحهم بس جرحة ما داواه

كاظم للوطن

صاح ابعلاة صوته

(اللي مضيع محب يمكن سنة وينساه بس المضيع وطن وين الوطن يلكاه)

كاظم راد من ايموت

دجلة يصير للركبة مخدة

والفرات الحاف

حتى اينام نومة محب

ولفه ابومتته وفاه

كاظم مات؟

منهو الگال كاظم مات ؟

كاظم عدل كاعد بيتكم موجود

اجه يسمع قصائد دامعه

نقراهه انه او ياه



كريم راضي العماري