بجه شموع الكمر من شافني ابجي جروح
وحط ايده عله خده وذابت شموعه
اضحكلك جذب وبكلبي تاكل نار
واشتل ورد بيك وروحي مشلوعه
جاشيصير كون تفك علي شباج
وطفي الظلام وتنهي موضوعه
خطيه اني ولك موبابي صار سنين
يتنطر جفوفك تمسح دموعه
نسيت شكثر اسهر ليلي وانته تنام
واشري عيون الك وعيوني مبيوعه
هسه الروح نخله ومايهمهه الماي
اذا طلبتك كطره احسبهه مكطوعه
مر طيفك خناجر بسمرت بلروح
انا مكطع وصل لتغرك اثيابي
سيف وحاربتلك والمنايه صفوف
رديت ولكيتك بايع كرابي
روحي ومرمرتها وماكلتلك ليش
لان موطبعي ادور ثمن لتعابي
تطفه النار بلتالي وتصير تراب
بس انه الوحيد النار بترابي
ماتطفه بعد والنار هيه النار
كلما يمر طيفك تشتعل ناري
مومشكله الراح ومايهمني الجاي
لان ثوبي صريح وطشن اسراري
الكاتلني الورد خنجر شلون يصير
والشاريه بروحي يبيع جماري
منشارك صلف ياما نشر بلروح
وانا من وصل يمك مات منشاري
صرتلك عود يعزفلك دمع وتنام
واول ماغفيت انكطعت اوتاري
تحياتي