منتديات حزن العشاق

الحافلة
# تعرفي ، قلت ليها ال ،،،،،،، ما تتدخلي بينا ، هو بيحبني انا ، و أنتي عارفه كدا كويس ، تخيلي قالت لي شنو ؟ ! ! تستمر في الحديث دون توقف ، و تمد شفتيها استهجانا ، قالت هي عايزه مصلحتنا ، هههههه تضحك بصوتك تهكمي ، تخيلي ، قالت عايزه مصالحتنا ،
* و انتي قلتي ليها شنو ؟
# قلت ليها لما تعرفي مصلحتك انتي اول بعدين تعالي شوفي لي مصلحتي ، الواحدة ما عارفه تختار ملابسها ، ههههههه ، و لا عندها ذوق ، و لا
قاطعتها زميلتها ممتعضة
* سيبك منها دي واحدة ما عندها موضوع ، كدي شوفي لينا موضوعنا ،
# قبيل ضربت ليهو قال نتلاقى في نفس المكان المعتاد ،
* بس ناس سهى ما يكونوا معانا
# لا لا موضوع سهى دا انا حسمتو معاها ، غيرت اتجاها
يضحكن معا ، ثم تضرب على كتف صاحبتها ، و تتابع ، في فرح ، انا ما وريتك ، ! !
تفتح الأخرى عينيها في دهشة ، و تركز بصرها ، و تحيل وجهها ، و جزء كبير من جسدها ، بقدر ما يتيح لها مقعد الحافلة ، و تميل بصدرها نحوها ، فتهمس الأخرى ،
# ناس بتاعه ، ههههههه ، تضحك باسمة ، شفتهم ليك جنس شي - و تتسع ابتسامتها - غياتو الله يستر .
تدخل الحافلة محجبة لا ترى من وجهها إلا عيناها ، نظر إليها كل ركاب الحافلة ، و قد صمت بعضهم عن الكلام ، كل علق بطريقته الخاصة ، أحدهم قال سبحان الله بصوت مسموع ، همس آخر لجاره : رأيك شنو ؟ !
همس له جاره : نسأل الله السلامة .
أحداهن مدت عنقها للأمام كأنها تود أن تتأكد من أن هذه أنثى حقيقة ، و ليس ممثلة في دور أنثى ، ثم حدثت نفسها سرا ( لو أنها لبست مثلنا لكان خيرا لها ) ، احداهن قالت لأثنتين بجوارها : هل هذا هو الحجاب ؟ !
كانت تلبس عباءة سوداء ، طويلة الأكمام ، و تغطي يديها بقفاز اسود ، و وجهها و رأسها ما عدا عينيها ، كانت العباءة ضيقة تظهر مفاتن جسدها ، و تربط حزام حول خصرها يبرز اردافها ، و صدرها الناهد .
قال أحد الركاب إسلام آخر زمن ، جاوبه آخر ، نساء آخر زمن ، و ليس الإسلام ، الإسلام منهن براء . همهم الجميع ،
جلست على مقعدها ، و أخرجت هاتفها الجوال ، و بدأت التصفح ،
ما زال الكمساري يصيح ، و الحافلة أوشكت على الرحيل ، دلف شاب على عجل ، و جلس في سرعة ، كأنه في سباق مع الزمن ، و سماعتي هاتفه على أذنيه ، و هو يتمايل ، لا يأبه بأحد ،
همست أحداهن في أذن رفيقتها : يا سلاااام على روعة و جمال هذا الشاب ، انظري لإستايل تسريحته ، و لبسه - يا الله - ذوقه رفيع في اختيار الألوان .
ردت عليها صاحبتها : ألا تعريفيه ، ؟ ! ! إنه ذاك الفنان المشهور .
قاطعتها الأخرى : هي ها ، ما بصدق ؟ معقول زول مشهور يركب مواصلات عامة . !
ردت عليها : ربما تعطلت عربته .
لكني سمعت عنه أنه يحب أن يكون وسط الناس عاديا من غير تميز ، سمعته مرة يقول ذلك ،
سمع الجميع محرك الحافلة ، فتنفسوا في ارتياح ، ها قد بدأت الحافلة أخيرا رحلتها ، رن تلفون احد الركاب ، بموسيقى ساخبة ، رد على المكالمة بمهل ، بعد أن قرأ أسم المتصل عليه ، كان الرد هادئا :
مرحب عصام
,,,,,,,,
لا و الله ، كنت قبل شويه معاهو ، و ما ذكر لي حاجة
,,,,,,,,

انا بعت ليهو مية قنطار بس ، و هو استلم السمسم ، و من اليوم داك بيماطل و ما عايز يدفع
,,,,,,,,
لا قلت اكلم صاحبو لو ما دفع بعد داك اكون طلعت من اللوم ، أني حافتح فيهو بلاغ .
,,,,,,,,,
على كل حال دا رأي .
طيب مع السلامة
الكمساري باسم يتحصل من الركاب ، و يهازر بعضهم ، و يسمع صوت السائق و هو يقول له : عمك دا ما تشيل منو .
يحاول أن يحتج ، فيرد عليه أحد الركاب :
يا أستاذ أنت خيرك على الجميع ،
فيمسح الأستاذ طرف عينه ، و يقول :
و الله لقد أخجلتوني ، و لولا ما اجده منكم ، لظننت أن الخير في الناس قد انتهى .
سأله أحدهم في استغراب :
ليه يا أستاذ ؟ لسه الدنيا بخيرها .
رد عليه الأستاذ :
و الله يا ولدي لي سنتين من ما نزلت المعاش ، و كل يوم في الوزارة ما صرفت حقوقي ،
رد عليه صوت في طرف الحافلة :
يا أستاذ ، بكره لو ربنا حيانا ، أسأل عن محمد عمر ، تعرفو يا أستاذ ؟
رد عليه الأستاذ :
لا و الله ما بتذكره
* يا أستاذ دا كان زمان تلميذك ، هو بيكون ما شافك ، لأنو انت علمتو ما يتلاعب في شغلو .
# يا ولدي رسالة ، و ربنا بيسألنا عنها .
= و الله انا مرة قابلتو حكيت ليهو مشكلتي براهو مش جاب لي حقي في محلي ، امشي ليهو بقلب قوي .
كان هذا التداخل من رجل كبير يجلس على المقعد الأمامي .
يرن جرس هاتف بصوت انتبه له الجميع ، على صوت فنان عربي شهير شاب ، تأملت صاحبة الهاتف اسم المتصل برهة ليست بالقليلة ، و هي تبتسم في شيء من الرضاء ، ممزوج بكبرياء انوثوي بين الترفع ، و الخيلاء ، و لسان حالها يقول : جئت في الوقت المناسب ، ليعلم الجميع بأني لست بائرة - كان عمرها قد تجاوز الأربعين قليلا - فما زال هناك من يهتم بأمري ، و يعجب بجمالي .
# آلو - قالتها و هي ترخم صوتها في غنج انوثي . حاولت أن تضع بها كل ما تبقى لها من حنان ، و عطف ، و دلال ،
;;;;;;;;;;;;;;;;;;;;;;;
# هههههههه ههه هه اي كنت منتظراك اليوم كلو
;;;;;;;;;;;;;;;;;;;;;;;;
لا و الله ، معقول بس ، في زول بيزعل من روحو
;;;;;;;;;;;;;;;;;;;;;;;;
# اكيد ، في نفس المكان و الزمان
;;;;;;;;;;;;;;;;;;;;;;;;
# طيب يا حياتي ، ما حاتأخر عليك ، مسافة الطريق بس ، باي
تلفتت حولها لترى اثر مكالمتها على الشباب في الحافلة ، رمقها رجل عجوز بنظرة ، حاولت أن تخفي خجلها بالتصفح في الجوال .
استدارت نحو محدثتها بكامل جسمها ، و وضعت ركبتيها على ركبتي محدثتها ، ثم نظرت إليها برهة قبل أن تقول :
شفتي عفاف ، و نهى ، و ست النفر ، قالن عندهن رحلة خاصة براااااهن ، شمشمت ليك كدا جبت ليك خبرن ،
قالن شنو ! ما عايزات واحدة فينا تعرف عشان ما نخرب ليهن ،
ضحكت الأخرى و قالت :
يعني نحن حساد و بنخرب العامرة ،
* شفتي كيف ؟ اصبري ليهن ،
# اها قولي لي التفاصيل ،
* بعدين بوريك الخطة الجهنمية .
# خلاص نتلاقى عند هدى
* طيب باي
رن هاتف في المقعد قبل الأخير ، انزلت طفلتها من رجليها ، و فتحت محفظتها ، انتهى زمن المكالمة ، و عاد الرنين مرة ثانية ،
* آلو
# '''''''''''''''''''
* و الله تمام ، و الناس كلهم بخير
# ''''''''''''''''''
* الأولاد بخير ، و الله اهو مع الجري بس ،
# '''''''''''''''''
* لا لا و الله لسه البيت و العيد ، البنات كسيتهن ، و الله فرحانات جنس فرح
# '''''''''''''''''
* لا و الله ما مشيت البلد ، بعد ما انتهي من موضوع البيت ، بعدين بمشي البلد كم يوم كدا
# ''''''''''