منتديات حزن العشاق - رساالــــــــة الى االبنفســــــــــــج...

منتديات حزن العشاق (http://www.chat-hozn3.com/vb/index.php)

- منتدى الشعر الشعبي العراقي و العربي (http://www.chat-hozn3.com/vb/forumdisplay.php?f=12)

- - رساالــــــــة الى االبنفســــــــــــج... (http://www.chat-hozn3.com/vb/showthread.php?t=543)

رساالــــــــة الى االبنفســــــــــــج...

البنفسج ....ذلك الكائن الرقراق ؟؟

الذي أهديته الى حبيبتي لحظة لقائي بها ..

وفوجئت بعد أن وجدت عطره في كف غيري ..

عذرا ايتها الحدائق ...فللعطر لغة لايفهما الا من رحم ربي

.....................................

يابنفسج ليش لونك بيه سواد؟؟

إنت ماظن للحدايق تنتسب

وثوب عطرك مو مثل باقي الثياب

ثوب عطرك سوته خيوط الجذب

يابنفسج انت ضد معنى الجمال

والتعلق بيك مايعرف يحب

يابنفسج جنت اضنك شي فريد

بعطره آفات المواجع تنصلب

ماجنت اتخيل بشمسك سمار

وما جنت اتصور بدينك ذنب

كتلك الشاعر رسول ابلا كتاب

شرط مو بلسانه يحجي من الكلب

وكتلك اعله الشاعريه اصل الحياة

بشرط ماتكتب دعاية ال أي حزب!!

يابنفسج مو صعب موت الحمام

انت بس اسألني وانطيك الصعب

الصعب دمع البرج لمّن يسيل

من تحط يمه الحمامه بلا سرب

كتلك الشاعر (منافق) من يكول

شجرة الزيتون ماتدخل حرب!!!

وكتلك الاحساس مو صورة ويموت

الصورة خطوة تموت لو ذمها الدرب

يابنفسج ليش مستغرب نداك؟؟

وناشفه الريح اعله خدك من تهب ؟؟

النده من ينزل بهيئة ملاك

النده موماي خاطر ينشرب

كتلك اعله الليل يخدع من يطول

الليل رايد شاعر بواهس صلب

اشكد خطية الشاعر الماعنده صوت

من يشوف بنيته بالسر تنسلب!!!

يابنفسج شيل عطرك من هواي

بيك ماريد النفس من ينحسب

كتلك اعله الدمعه مو واجب تطيح

(الدمعه جلمه تموت لمّن تنكتب)!!

وكتلك جناح الفراشة بظله نور

ينكسر كلب الورد من ينحجب

يابنفسج ليش من كتلك تعال ؟؟

من الحديقه نشيل مفردة الرعب

درت وجهك جني مو ذاك الحواك

بصدر صدره وبالكلب شالك كلب !!

يابنفسج شيل مفردة الغرام

ريحة العاكول مو مثل الشلب !!

كتلك عيون الصبح مابيها صوج

لو لكيت تراب طايح عالعشب

العين روح نزرعت براس الجمال

تشوف كلشي بموتها بلون الهدب